Naalliutsitsisarneq allatigullu inuttut naleqassutsimik innarliineq akiorniarlugit Naalagaaffiup Danmarkip suliniutai, Naalagaaffiit Peqatigiit Naalliutsitsisarneq pillugu ataatsimiitaliaata novembarip ulluisa arfineq-pingajuanni qulingiluaannilu nalilersorpai.

Naalliutsitsisarneq pillugu ataatsimiitaliap suliassaqarfiit pingaarutillit nalunaarusiamini tikkuarpai, ilaatigut spiralilersuisimanermi Naalliutsitsisarneq pillugu Isumaqatigiissummik malinnittoqartariaqartoq. Taama Inuit Pisinnaatitaaffii Pillugit Siunnersuisoqatigiit tusagassiuutinut nalunaarumminni paasititsipput.

Peqqinnissaqarfik Kalaallit Nunaata 1992-imi tigummaguli, sulianik misissuisoqarnissaanik pilersaaruteqartoqannginnera, isumalioqatigiissitap ernumanartoqartippaa.

Misissuinerit annertusineqassasut kissaataasoq

Naalagaaffiup Danmarkip, ilaatigullu Kalaallit Nunaata Naalliutsitsisarneq pillugu Isumaqatigiissutip malinneqarnissaanut suliniutaasa Naalagaaffiit Peqatigiit misissuiffiginninniarnera, Inuit Pisinnaatitaaffii Pillugit Siunnersuisoqatigiit (IPS) siulittaasuata, Qivioq Løvstrømip, nuannaarutigaa.

IPS-ip ICC Meeqqallu Illersuisoqarfiat peqatigalugit kaammattuutiginikuuaat, spiralilersuisimaneq pillugu nakerisarsiunngitsumik misissuisoqarnerani 1991-ip kingornanut annertusineqarnissaa, Kalaallit Nunaata peqqinnissaqarfiup suliassaqarfianik tigusinerata kingornanut:

- Naalagaaffik imaluunniit pisortaqarfik inuit pisinnaatitaaffiinik innarliisinnaasumik iliuuseqarpat, suliat tamarmik iterngi tikillugit misissorneqassapput – Kalaallit Nunaatalu Peqqinnissaqarfiup 1992-imi nunatsinni tiguneqareernerata kingorna, spiralilersuisimaneranik pasitsaassisoqarpat, soorunami aamma suliat taakku misissuiffigineqassapput.

Niviarsiaqqat arnallu pisinnaatitaaffiinik sakkortuumik innarliineq

- Akuersisitseqqaarani spiralilersuineq, iliuuseqarnerup qanga pisimanera apeqqutaatinnagu, niviarsiaqqat arnallu nammineq aalajangersinnaanermut pisinnaatitaaffiannik innarliineruvoq annertooq, Qivioq Løvstrøm oqarpoq nangillunilu:

- Naalagaaffiit Peqatigiit naalliutsitsisarneq pillugu ataatsimiititaliaata isornartorsiuinerata nunatsinnit akuerineqarnissaa, ataatsimiititaliallu innersuussutaasa sapinngisamik piaarnerpaamik iliuuseqarfiginissaat neriuutigaarput naatsorsuutigalugulu.

Septembarimi taamanikkut Peqqinnissamut Naalakkersuisup, Mimi Karlsenip (IA), misissuinerit ullumikkut tikillugu ingerlanneqarnissaat akueriumanagu, danskit tusagassaqartitsivianut Informationimut, allakkatigut akissummini paasititsivoq.

Suliat ataasiakkaat pineqarnersut imaluunniit nunatta peqqinnissaqarfiani nalinginnaasumik ajornartorsiutaanersoq taamaattumillu annerusumik misissuiffigineqartariaqarnersoq, nunatta nakorsaaneqarfiata suliat nutaajunerusut pillugit paasissutissiinissaa utaqqiumallugu, Mimi Karlsen paasititsivoq.