Qulimiguulik ajutoorsimasoq nunamut kalinneqarpoq
Qulimiguulik pingasunngormat Narsap eqqaani ajutoortoq nunamut qaqinneqarpoq.
Pingasunngormat ualikkut Narsap kujataata kangiani 13 kilometerisut ungasitsigisumit qulimiguulik ajunaalernermik kalerrisaarivoq.
Qulimiguulimmi timmisartortartoq kisimiissimasoq, annaassiniarnermilu annaanneqartoq, politiit pingasunngormat unnukkut nalunaarput.
Qulimiguulik nunamut kalinneqarsimasoq, taamaalillunilu imaaniikkunnaarsimasoq, pigaartut pisortaat Anette Ostenfeldt sisamanngormat ullaakkut nalunaarpoq.
Pigaartut pisortaat maannakkut pisoq pillugu oqaaseqarsinnaanngilaq.
Oqaluttuarporli suliamut atatillugu politiit killisiuiumaartut, aamma ajutoornerit pillugit ataatsimiititaliarsuaq peqataatinneqarumaartoq, ataatsimiititaliarsuup timmisartut ajutoorneri misissortarmagit.
Qulimiguulik ajoquteqarmat timmisartortartoq mittariaqalersimasoq Sermeq Helicopters, qulimiguulimmik piginnittoq, Facebookimi allappoq.
