Pineqaatissinneqarsimasunut inissiisarfinni nakkutilliisut atugaat suli inissinneqanngillat
Pinerluuteqarsimasunut inissiisarfinni nakkutilliisut aningaasarsiatigut sulinikkullu atugaat pillugit isumaqatigiissut ukiortaartinnagu Parnaarussiviup kattuffiata piareernissaa naatsorsuutigaa.
![](/sites/default/files/styles/930x500/public/media/anstalt_for_domf_0d46071.jpg?itok=NYhRH8Lp)
Kalaallit Nunaanni Pinerluttunik Isumaginnittoqarfimmi inissiisarfimmi nakkutilliisut isumaqatiginninniarnermi akissarsiaat 2019-imi annertuumik qaffanneqarput.
Akissarsianik qaffaanikkut sulisussaaleqineq annertooq aaqqinneqarpoq, oqaluttuarisaanermilu akissarsiatigut kingulerunneq iliuuseqarfigineqarluni.
Isumaqatigiissulli 2020-miit 2023-muinnaq atuuppoq, tassa imaappoq qaangiunnissaa qaammataajunnaarpoq, qallunaallu naalakkersuisui arlaleriarlutik nuannersumik oqariartoraluartut, isumaqatigiissut suli inissinneqanngilaq.
Inissiisarfimmi atorfilillit katersuuffiata, Parnaarussiviit Kattuffiata siulittaasua, Bo Yde Sørensen, Kalaallit Nunaanni suleqatiminit arlalinnit ernumasunit attavigineqarsimalluni, Sermitsiaq.AG-mut paasissutissiivoq.
Ukiumut 40.000 koruuniniit 138.000 koruuninut pineqarput.
- Isumaqatigiissutip sivitsorneqarnissaa naatsorsuutigilluinnarpara, Kalaallit Nunaannilu suleqatitta ilai eqqissisarnikuuakka, Bo Yde Sørensen oqarpoq.
Isumaqatiginninniarnerit eqqarsaatigalugit paasissutissanik itinerusunik tunniussaqarnianngilaq, Parnaarussiviilli Kattuffiata isumaqatigiissummik inissiisoqarnissaanik nukingisaarisimallutik naqissuserpaa.
Kattuffiup siulittaasua aallaavigalugu, aningaasat annertuut inissiisarfimmi sulisut annaaratarsinnaavaat. Ukiumummi 40.000 koruunit 138.000 koruunillu akornanni isumaqatigiissummit qulakkeerneqartarput.
Ataasinngormat qallunaat naalakkersuisuisa Danmarkimi parnaarussivinni paarsisut aningaasarsiaanik qaffaarujussuarnissaq isumaqatigiissutigaat, isumaqatigiissulli nunatsinni inissiisarfimmi sulisunut sunniuteqarnavianngilaq.