Nuuni Ivalop ulloq inuuissiorfini eqqorlugu nalliuttorsiutigineqaqqaarnerani ulloq inuuissiortup namminerpiaq kissaatai malillugit nalliuttorsiutigissavarput, taamak Sermitsiaq.AG-mut oqaluttuarpoq Nuuni Ivalop anaanaaa Ivalo Frank Larsen:

- Aatsaavissuaq ulloq inuuini eqqorlugu inuuissorngaarpoq. Inunngorpormi ulloq 29. februar 2020-mi. Qularnanngilluinnarpoq ulloq nuannerluni, nalliuttorsiorfiulluarluni aammalu eqqaamanartuaannartussaajumaartoq, ullorlu qanoq nalliuttorsiorfigissaneripput inuttaata namminiivik kissaatai malillugit ingerlatissavarput.

Angajoqqaavi pilersaaruteqarsimagaluarput illoqarfimmi nalliuttorsiornerni inimik attartortakkat ilaannik atorlugit ilaquttaminnut, ikinngutiminnut nalunngisaminnullu kaffisoriartoqqusissamaarlutik, ullormi immikkuullarissuugami, aatsaavissuarlu ullqo eqqoqqissaarlugu inuuissiorluni. 

- Paneeqqattali toqqarpaa uagutsinni ullorsiussasugut, taamaammat uagutsinni kaffisortitsissaagut, anaanaa Ivalo Frank Larsen oqauttuarpoq.

Ulloq eqqoqqissaarlugu nalliunnissaa sioqqullugu angajoqqaavisa Ivalo Frank Larsenip aamma Jaakunnguaq Larsenip ukiut tamaasa ullut marluk paneerartik inuuissiortittarpaat tassa 28. februar aamma 1. marts, tassungalu immikkut ittumik nassuiaatissaqarpoq:

- Kissaatigilluinnagaraarput taanna meerannguarput. Nunarsuarmut appakaalluni inunngornermini inuunerput sunit tamanit nallerneqarsinnaanngitsumik pisuunngortinnikuuaa, taamaammat aalajangernikuuarput ukiut sisamakkaarlugit ulloq eqqorlugu inuuissiunngikkaangat, taava februarip naggataa martsillu aallaqqaataa tamaasa nalliuttorsiorfigisassallutigit, aamma siunissami taamaaliortuassaagut, anaanaa Ivalo Frank Larsen oqaluttuarpoq.

Nuuni nunatsinni inunnik 35-nik inuueqateqarpoq

Ukioq ilasami ukiup ullui ullormik ataatsimik ilasaasarput, ullorsiutillu malitatta gregorianskiusup najoqqutai malillugit ulloq taanna februarimut inissinneqarnikuuvoq, taamaalilluniu februari nalinginnaasumik 28-nik ulloqartaraluartoq ukiut sisamakkaarlugit 29-nik ulloqartarpoq. Ukiut ilasat isumagisarpaat ullorsiutigut allanngoraratik aalaakkaasuunissaat.

Tassalu ukiumi ilasami ulloq 29. februar aatsaat ukiut sisamakkaarlugit pisarpoq,  taamaammat immikkuullarissuuvoq ulloq, tassami aamma qaqutigoorpoq naalungiarsunnguit ulloq taannaqqissaaq nunarsuarmut anillattarnerannut, Nuunili inuueqataalu 35-it allat ulloq taanna inunngornikuupput, taamaammallu ulloq eqqoqqissaarlugu ullumikkut "ilumoortumik" inuuissiorput.

Sermitsiaq.AG-mit Kalaallit Nunaata Naatsorsueqqissaartarfia aperinikuuarput ulloq 29. februar nunatsinni inuuillit ukioq manna inuuissiortut qassiunersut:

- 1. januar 2024-mi nunatsinni najugaqartut 36-it ulloq 29. februar inuuissiortarput. 36-iusunit taakkunannga 32-it Kalaallit Nunaanni inunngorput. Taakkunanngalu arnat 21-iupput, Kalaallit Nunaata Naatsorsueqqissaartarfianit ilisimatinneqarpugut.

Ullumikkut 29. februar inuuissiortut tamaasa pilluaqquagut ullorsiorluarnissaannillu kissaallugit.