Maskiina nammineerluni eqqarsarsinnaasoq (Artificial Intelligence) nunatsinni pisortanit atorneqalissappat, paasissutissanik atueriaatsimini pissuserissaartuullunilu akisussaassuseqartumik pissasoq pisortaqarfiit uppernarsarsinnaasariaqaat Naalakkersuisut piumasaqassapput.

Múte Bourup Egedep IA-mi suleqatiminut Asii Chemnitz Narupimut, paragraf 37 naapertorlugu apeqquteqartuusumut, akissutaani tamanna erserpoq.

- Pisortaqarfinni AI atorneqalissappat, tamanna ersarissumik tunngaveqarluni pissaaq. Pisortaqarfinnit uppernarsarsinnaasariaqarpoq maskiina nammineerluni eqqarsarsinnaasoq qanoq paasissutissanik pissarsisimanersoq. Taamaaliortoqassaaq innuttaasut suliffeqarfiillu sullinneqarneranni aalajangiineq tutsuiginartumik eqqortumillu pisariaqarmat, akissummi erseqqissaatigineqarpoq.

Kalaallit Nunaanni pissutsit immikkuullarissut

Múte Bourup Egede naliliivoq, pisortaqarfinni suliassani assigiinngitsuni AI atorneqalersinnaasoq, taamaattorli Kalaallit Nunaanni pissutsit immikkuullarissut atuuttuussasut erseqqissarneqarpoq:

- Kalaallit Nunaanni pisortaqarfinni allaffissorneq eqqarsaatigalugu suliassaqarfiit ilaat suli digitaliseererneqanngillat, imaluunniit paasissutissat tunngaviusut AI-mi atorneqarsinnaanngillat.

Peqqinnissaqarfiup, ilinniartitaanerup atugarissaarnerullu iluani digitalip ineriartorneranit Kalaallit Nunaata iluaqusiinissaa naatsorsuutigineqarpoq.

Akunnattoorfiit pingasut

AI atulertinnagu akissummi akunnattoorfiit pingasut eqqumaffigineqartariaqartut allattorneqarput:

• lnnuttaasut assigiinngissusaat eqqarsaatigalugu paasissutissat naapertuutinngissinnaaneri.
• Paasissutissani tamanut saqqummiunneqarnikuusuni allanngortiterisimasinnaaneq - tassa deep fakerineq, taamaalilluni assit, nipit videollu nikanarsaatigineqarsinnaaneri.
• AI-p ilinniarnermut atatillugu suliassanut, qinnuteqaatinut allaatigisanut assigisaanullu atorneqarsinnaanera.

- Suliassaqarfiit ilaanni innuttaasunut suliffeqarfinnullu sunniuteqartussanik AI atorlugu aalajangiisoqartalissappat, paasissutissat eqqarsaatigalugit kukkusumik aalajangiisoqarsinnaanissaa eqqarsaatigalugu isumatusaarnissaq nalilersorneqartariaqarpoq. AI atulissagaluarpat, navianaataasinnaasut appasittumeeqqaartariaqarput, Múte Bourup Egede oqarpoq.

Atorneqarnissaanik pilersaaruteqartoqanngilaq

Bourup Egede ilisimatitsivoq, AI-p innuttaasunut attuumassutilinnut atorneqarnissaanik pilersaaruteqartoqanngitsoq. Taassuma saniatigut naqissuserneqarpoq, taamaattoqassappat "sillimaniarneq eqqarsaatigalugu atorneqassagaluarpat inatsisini atuuttuni allannguisoqartariaqartoq."