Borgmesteri Stine Egede: - Taamatut pisoqaqqissanngilaq
Kommune Kujallermi borgmesteri Stine Egede assut ajuusaarpoq 23. december 2023-mi ilisineq ilaqutariinnut tupatsitaarujussuarnertalik pillugu. Ilaqutariinnit saaffigineqarami taanna ingerlaannarluni qisuariarpoq piumasaralugulu ilisinermi periaatsit isumannaatsuunissaannut kommunip suliassai sukateriffigineqassasut, ajutoornerit ajuusaarnaqisut taamaattut siunissami peqqinnginnissaat qulakkeerniarlugu. Taamatuttaaq sumiiffimmi illerfissarsiniaqatigiit illerfiit pitsaassuunissaat pillugu suliniuteqarput.
![](/sites/default/files/styles/930x500/public/media/kiste_pa_gravplads.jpeg?itok=WOXBp89E&c=36f969a1cd42a0f3144bb53ab0ac7530)
Kommune Kujallermi borgmesteri, Stine Egede (IA) ilaqutariinnit saaffiginnissut takugamiuk ingerlaannartumik akissuteqarpoq annaasaqarneranni misiginneqatigalugit aammalu ilisinermi nalaataat ajuusaarutigalugu, ilisinermi tassani illerfik aserorpoq ilisaasullu timaa assaaffimmut nakkarluni.
- Naammagittaalliuut tigugakku ingerlaannarlunga ilaqutariit annaasaannik misiginneqatigalugit aammalu minnerunngitsumik ilisinermi nalaataat pillugu ajuusaangaarnera ilaqutariinnut apuuppara. Tamatuma saniatigut kommunimi sulisut ilisinernut atatillugu suliaqartartut attuumassuteqartullu tamaasa katersuutsippakka taamatut pisoqaqqinnginnissaanik qulakkeerinnittumik suliaqarnissaat piumasaralugu, borgmesteri Stine Egede Sermitsiaq.AG-mut nassuiaavoq.
Stine Egede erseqqissaavoq maanna kommunip tungaanit ilineqarfissanik assaasarnerni naanaarisoqartarsimanera aminaarisoqartarsimaneralu peqqissanngitsoq qulakkeerniarneqarsimasoq, aammalu assaanermi illerfiit angissusaannut uniuinngitsumik najoqqutassat tunngavigalugit assaasoqartuaannassaasoq isumannaarniarneqartoq.
Ilisisoqartillugu oqartussaasut arlallit suleqatigiittarput
Ilisisoqartillugu Oqaluffik ilisineq ataatsimut tamaat isigalugu isumaginnittarpoq. Toqukkut qimagussimasut toqusut inaannukaanneqartarput, illerfissaminnut tassani ilineqartarput naggammillu tussiuaatigineqarnissaminnut piareersarneqartarlutik, tamatuma kingorna oqaluffimmi naalagiaqatigiinnikkut ilisineq ingerlanneqartarluni. Ilisinermi naalagiarnermi iliveqarfiliaassinermi iliveqarfimmilu toqukkut qimaguttup naggammik qasuersaarfissaanut ilisinermi palasi siuttuusarpoq.
![Flere danske præster siger nej til at vie fraskilte. Foto: Sermitsiaq Arkiv](/sites/default/files/styles/60x100/public/media/pr_st_pr_stekjole_51919a.jpg?itok=-TNgShjr)
Ilisineq sioqqullugu kommunip isumagisarpaa toqukkut qimagussimasup naggammik qasuersaarfissaanik assaaneq, kommunillu sulisui ikiuuttarput ilisineq naammassineqaraangat matooreqataallutik.
Illerfik sanningasortassaalu aammalu ilisinermut atatillugu suliassat aningaasartuutitallit sumiiffimmi illerfissarsiniaqatigiit isumagisarpaat, ilisaasoq ilaasortaasimagaangat aningaasartuutaasut illerfissarsiniaqatigiinnit isumagineqartarput. Ilaasortaanngitsut aamma sullinneqartarput, illerfissarsissussisoqartarluni sanningasortassaanillu, taakku illerfissarsiniaqatigiit aqqutigalugit pisiarineqartarput aningaasartuutaasulli tamarmik qimagaasunit isumagineqartarlutik.
Illerfissarsiniaqatigiit: - Illerfiit qajannaannerunissaat noqqaassutigivarput
Aamma Qaqortumi illerfissarsiniaqatigiit siulittaasuat, Anthon Joseassen assut ajuusaarpoq ilisinermi pineqartumi pisimasut pillugit:
- Ilisineq taanna tupatsitaarujussuarnermik nassatalik qaangiummat aqaguani illerfinnik sanningasortassaanillu pisiniartartorput palasilu marluulluta ornipparput, taakkulu ataatsimeeqatigaagut siunissami assingusumik nalaataqartoqaqqinnginnissaa qulakkeerniarlugu. Noqqaavigaagut illerfissanik qajannaannerusunik siunissami pissarsiniartoqartassasoq, pingaartumik illerfiit naqqisa issunnerunissaat piumasaralutigu, maluginiarnikuuarpummi illerfiit tikisittakkat naqqi saappallaarlutillu qajannartuusut, sumiiffimmi illerfissarsiniaqatigiit siulittaasuat, Anthon Joseassen nassuiaavoq.
Tamatuma saniatigut aamma naggammik qasuersaarfissat assanneqarsimasut illerfiit angissusaannut sanilliullugu naanaagaallutillu amippallaartarnerat ataasianngitsumik illerfissarsiniaqatigiit naammattoorsimasarsimasut taanna oqaluttuarpoq:
- Ataasialinngilaq assaanermi ilineqartup illerfiata angissusaanut sanilliullugu naanaarinnittoqartarnera aminaarinnittoqartarneralu. Arlaleriarlutami naammattoorparput toqukkut qimaguttup illerfiata angissusaanut sanilliullugu assatat naappallaarlutillu amippallaartartut, ataasiaratalu tamanna ajornartorsiutaasoq erseqqissaatigisarparput. Assut ajuusaarpunga ajutoortoqarmat aatsaat ajornartorsiut aaqqinneqarmat, maannali aaqqinneqarpoq, ilisinerillu toqqissisimanartumik tuppallernartumik kusanartumillu isumagineqartarnissaat tamatta suleqatigiissutigisariaqarparput, Anthon Joseassen naggataatigut oqarpoq.