Assit takukkit: Narsami juullimut niuffatsitsisoqarnerani nuannisarluartut
Sapaassuaq aqaguttoq illoqarfiup innuttaasuinut tikeraanullu Narsap timersortarfiata matui ammatinneqaqqipput.
Ukiut siuliini ungdomsklubbi, sunngiffimmi ingerlatsivik pitsaaliuinermullu siunnersorti paarlakaallutik sapaassuaq sioqqullugu arfininngornermi kingullermi Narsami juullimut niuffanneq aaqqissuuttarpaat.
Ukioq manna timersoqatigiit N85 aaqqissuisuupput, inuppassuillu takkupput nuannisarluarnermillu pilersitsillutik.
Ukioq manna juullimut niuffatsitsisoqarnerani Matio Morthensenip Fru Wyrnallu balloniutai sukkasoorujussuarmik tunineqartut nuannarineqarnerpaapput.
Ukioq manna nutaanik ilusilinnik meeqqallu iperartuussagaluarpagu balloni natermiiginnarsinnaaniassammat oqimaalutsikkamik meeqqat tamarmik ballonimik perusupput.
Ataatsimut isigalugu illoqarfimmi ualeq nuannersoq.
